Hver er manneskjan?

Þá erum við búnir að láta trollið fara í annað sinn í hafið, köstuðum seinnipart fimmtudags og var híft aftur í gærmorgun, var þá komið skítaveður og bræla, pumpuðum 400 tonnum af svartkjaftinum um borð. Var Ægir ekki fallegur á að líta í gærdag og höfðum við því hægt um okkur, en er kvölda fór í gærkvöldi fór hann að sína okkur smá miskunn og var ákveðið að trollið skildi í hafið fara og erum við á toginu í þessum skrifuðu orðum. Tók ég stutt spjall við Hjálmar yfirstýrimann og tjáði hann að lítið væri um að vera, "bölvaður skakstur og lítil innkoma" en 3 neminn hafi verið rauður áðan en breytt sér svo aftur í fagurgrænan framsóknarlit og virðist líka hann vel.

En þá að allt allt öðru, eins og kunnugt er þá vorum við í slipp í Reykjavík s.l. haust og var nóg að gera í handraðanum þar við hinar ýmsu endurbætur og fleira. Var okkur vélaliðinu og Stéfáni stýrimanni boðið í stórfenglegt matarboð til yndislegra hjóna á höfuðborgarsvæðinu. Er frúin á heimilinu í miklu uppáhaldi hjá Stéfáni en hún hefur lesið sig inn í hug og hjarta okkar Íslendinga með sinni einskærri rödd á undanförnum áratugum.

Spyr ég nú, hvað heitir þessi ástsæla kona og hvaða þætti stýrir hún í útvarpinu?

Viljum við senda þeim skötuhjúum okkar bestu óskir og þökkum enn og aftur fyrir frábæran mat og yndislega kvöldstund í september sl.

Kv. Jón Kj.

SVH

Athugasemdir

[Kristján R Bjarnason, 7.3.2009 kl. 08:08]

ætla að giska á að þetta sé Sigríður Guðmundsdóttir sem sér um óskastundina á rás 1

[Jón Kjartansson SU-111, 7.3.2009 kl. 16:44]

Kristján, þú ert mjög heitur, en ekki 100% rétt

[Nágranni Stebba á Kongó (IP-tala skráð) 7.3.2009 kl. 21:35]

Gerður G Bjarklind

[Jón Kjartansson SU-111, 8.3.2009 kl. 01:18]

Rétt er það, "nágranni Stebba á Kongó", þetta er engin önnur en Gerður G Bjarklind stjórnandi Óskastundarinnar. Hefur Stéfán verið að ræða þetta matarboð mikið á Djúpavogi? Okkur er spurn, var hann mjög ánægður að hitta uppáhalds þáttastjórnanda sinn, sendum við bestu kveðjur til Stéfáns.

[Baddi (Aðalsteinn Jónsson) (IP-tala skráð) 8.3.2009 kl. 12:48]

Þetta hefur nú ekki verið mikið rætt,en ef ég þekki hann Stebba rétt þá veit ég að hann er mjög montinn með þessa heimsókn. Kveðjur til ykkar frá okkur hér á kongó. Baddi og Stebbi