Sjómenska

Jæja þá er það að segja af okkur að í gær voru hífð 70 tonn og leitað svo í austur og kastað í gærkvöldi og híft aftur í dag ein 280 tonn en í dag varð sá maður sem er búinn að vera hvað lengst á þessu skipi eða frá því þetta hét Eldborg afmæli og varð 52 ára svo að það var sett á tertur fyrir karlinn og var hann Bjarni Kristjánsson bara þokkalega sáttur með þetta og var svo grillað í kvöld .kv SU111.

Góður afli í dag

Jæja þá erum við komnir aftur út eftir löndun en það vigtaði 2100 tonn úr bátnum enda ekki alveg fullir hér var kastað í gær kvöldi og híft eftir hádegi ein 300 tonn og svo var híft aftur áðan 350+ eftir tæpa fjóra tíma og voru bæði holin með hreinum makríll og erum við nokkuð sáttir með þetta .kv SU111.

Það er svo

Hér er búið að taka nokkur híf frá síðustu færslu og eru við komnir með 1800 tonn og erum á reki vegna bilunar í vél en Guðni og hans þrælar þeir Böbbi og Doddi eru að redda málunum en við hífðum eftir þrjá tíma áðan ein 230 tonn sem er mjög gott en það er víst góð veiði núna hjá bátunum og þá er bara að vona að við klárum að fá í dallin .kv áhöfnin á Jóni Kjartans

Þetta kemur

Hér var híft í gær ein 200 tonn og 60%makríll svo var halað núna í morgunsárið og voru 300 tonn og 75-80% makríll og er bara vonandi að þetta gangi bara vel .

komnir á veiðar

Þá erum við komnir aftur á veiðar en við vorum í smá verkefni fyrir Tandraberg og Eskju það fólst í því að fara með þó nokkuð magn af stórum steinum sem búið var að setja tóg í og baujur en þetta er fyrir kræklingaræktun og var þetta sett á tvo staði við hólmanesið og við grímuna sem er sunnanverður í reyðarfirði en hér var híft í gærkvöldi og reindust það vera 250 tonn .   kv áhöfnin á Jóni Kjartans.

Tvær hífingar í dag

Já það var híft tvívegis í dag í fyrra skiptið var um átta í morgun en þá voru heilar 130 lestir að fróðir menn segja og svo var galað í kallkerfið kl 10 í kvöld til að taka trollið og var aðeins skárra eða 150 tonn og erum að stíma í norður eins og er .  kv. Áhöfnin á Jóni Kjartans.

Þá er það makríll

Hér hefur verið lítið skrifað upp á síðkastið en af okkur er það að frétta að við fórum frá Eskifirði á síðasta laugardag og erum búnir að taka nokkur hol frá 280 tonnum og niður í ekki neitt svo er búið að vera smá vandamál að koma þessu kláru í hafið en við erum með frekar stóra belgi á höfuðlínuna og vilja þeir flækjast aðeins en þetta hefst yfirleitt alltaf og er aflin orðinn einhver 800 tonn .   kv áhöfnin á SU 111.           

Kolmunnavertíð lokið

Já góðir hálsar, og restin af búknum, þá erum við komnir á landstím og stefnan sett á Eskifjörðinn, eins og allar okkar veiðiferðir enda. Datt botninn úr allri veiði hér á Færeyjarmiðum og virtist sem svartkjafturinn hafi hreinlega gufað upp, náðum við að snara um 1250 tonnum í bátinn áður en yfir lauk. Segja tíðindin það að kvótinn sé uppurinn og búið sé að taka eitthvað af kökunni sem býður okkar á næsta ári.

Höfum við tekið saman það helsta um þessa vertíð: fórum við 10 veiðiferðir á svartkjaftaveiðar og fiskuðum við alls 13.600 tonn. Byrjuðum við veiðarnar á svokölluðu gráa svæðinu sem er á milli Færeyja og Skotlands, svo var tekin smá pása á kolmunna og farið á gulldeplu. Eftir hana tók svo alþjóðlega svæði vestan við Írland, Hatton-Rockall svæðið við. Er óhætt að segja að það sé eitt versta hafsvæði sem um getur og hefur ein mesta ölduhæð í heimi mælst þar, 29,1m (Google).  Var svo haldið þaðan aftur á gráasvæðið og í færeyskan sjó. Miklar og langar siglingar standa að baki þessarar veiðiferða, telst okkur það að alls sé búið að sigla um 9.000 sjómílur, er þá ekki talið með leit og "kippir" í veiðiferðum.

Svo við setjum þetta í eitthvað samhengi þá eru 9.000 sm. samtals 16.668 km. Jafngildir það að fara hringveginn, þjóðveg nr. 1, 12 sinnum og 1/2 hring betur. Er það sú sama fjarlægð og frá Íslandi til suðurpólsins.

Sést svo hér hvar helstu átakasvæði okkar hafa verið í vetur, þ.e.a.s. gráa svæðið og Hatton Rockall, hafa siglingar þangað niðureftir reynt á menn og ekki síst skip ef þess á að geta.

Annars er það að frétta, er við vorum að gera sjóklárt í gærkvöldi sigldi eitt glæsilegasta skip í N-Atlantshafi, og þó víðar væri leitað, framhjá okkur. Var það að sjálfsögðu hin nýja Norðborg sem var á leið til sinnar heimahafnar í fyrsta sinn, verður hún í Klakksvík kl.14:00 og er mikil móttökuhátíð hjá Færeyingum af því tilefni. Hægt er að skoða dagskrá hér.

Það sem tekur annars við hjá okkur eru þrif á skipinu og einhver viðhaldsvinna hjá vélstjórum og leyfum við ykkur nú að fylgjast eitthvað með hvað er að gerast.

Þar til næst.

Kv. Jón Kj.

SVH

Veiðar hafnar

Jæja, þá erum við byrjaðir á veiðum í okkar síðasta túr, fengum við skítakalda á okkur hingað og var því ákveðið að sigla í gegnum Vestmannasund, en það skilur að eyjarnar Straumey og Vágar.

Sést hér á myndinni hvar Vestmannasundið liggur og hvar við sigldum um. Má þess geta að vindmælirinn hjá okkur sýndi 30m/s rétt áður en við komum inn í sundið, blés því Kári hressilega.

 

 

 

Landslagið í Færeyjum er stórkostlegt, þar sem fjöllin há rísa uppúr hafinum með sínar snarbröttu hlíðar. Hér er það Koltur sem rís úr djúpi hafsins. En Koltur þýðir folald og á það vel við því næsta eyja við heitir einmitt Hestur og er mun stærri en Koltur.

 

 

Hestur er svo sunnan við Kolt, tignarlegur að sjá. Ekki hef ég hugmynd um af hverju þessi nöfn koma til, kannski einhver naskur netverji sem geti frætt okkur um það?

 

 

 

 Erum við búnir að taka tvö hol eftir að komið var á bleyðuna, hefur það nú ekki gengið snurðulaust fyrir sig. Hífðum við í gærkvöldi, voru þeir félagar Ægir og Kári heldur betur búnir að færa sig upp á skaftið og létu ófriðlega, er hlerar voru komnir upp og byrjað var að hífa á tromlunni hófust herleg heitin. Átti nú okkar öfluga tromla við ramman reip að draga, kvein og söng í öllu spilkerfinu eins og enginn væri morgundagurinn, svo þungt var í. Háðum við mikla baráttu við að ná þessu upp, minnti þetta einna helst eins og verið er að draga barmafulla nót á staut, vísuðu troll og höfuðlínukapall lóðbeint niður. Eitthvað varð undan að láta og slitnaði höfuðlínukapallinn hjá okkur og er við vorum að ná stykkinu inn byrjuðu möskvar að slitna og leysi og fleira, var nú kappkostað að koma þessu inn og gekk það furðuvel, alveg eins og vel smurð vél. Endaði þetta allt vel og náðum við sekknum á síðuna þar sem dælt var 530 tonnum úr honum, reiknast svo að komið er 850 tonn í bátinn eftir þessi tvö hol.

Ekki þótti ráðlegt að kasta aftur þar sem skíta bræla er á miðunum, vonumst við að lægi eitthvað með morgninum svo vara trollið fái að spreyta sig í undirdjúpunum við að klófesta svartkjaftinn.

Þar til næst

Kv. Jón Kj.

SVH

Til hamingju með daginn verkalýður

Þá erum við haldnir aftur til hafs á ný eftir að Tandrabergsmenn hafa landað uppúr skipinu, reyndust vera 1940 tonn af 1.flokks kolmunna sem við bárum að landi í þessum túrnum. Slegið var í klárinn klukkan eitt í nótt og stefnan sett á Færeyjarmið. Höfum við fengið á okkur kaldaskít í dag, á degi verkalýðsins, einnig á Raggi okkar stýrimaður afmæli í dag og fær hann bestu kveðjur í tilefni dagsins, er hann 44 ára gamall.

 Afmælisbarnið í nærmynd.

Fyrsti maí  í Malaga, fyrsti maí í ár
Þúsundir manna í kröfugöngu
með slagorðsspjöldin letruð á
Gaddavír, gúmmíkylfur
vélbyssur sólin skein á
Fyrsti maí  í Malaga
Fyrsti maí í ár.

Það var fallegt veður í Malaga
Þegar Francisco heiman fór frá
í hvítum fötum með stráhatt að láni
hafði fengið Don Petró hjá.

Konan sat heima og hamaðist
að pússa skeljar, flétta strá
sem hún seinna sendi á markaðinn
seldi stykkið 25 peseta á.

Börnin út á götu betluðu
sólarlandatúristar horfðu með viðbjóði á
struku sér um magann
og ultu inn á næstu krá.

Kröfugangan var barinn niður
hestar tröðkuðu fólkinu á.
Gúmmíkúlur, öskur,  blótsyrði
kveinstafir, tár.

Það var 1. maí í Malaga
að Francisco dauður í götunni lá
Fyrsti maí  í Malaga
Fyrsti maí í ár.

 

Er þessi texti eftir meistara Bubba Morthens, má einnig nefna að tónleikar voru með honum í gærkvöldi á Eskifirði og þóttu þeir takast mjög vel. Ekki komst undirritaður til að hlýða á kónginn þar sem hann þurfti að sinna sínum skyldum í lönduninni, en fóru nokkrir fulltrúar áhafnarinnar, m.a. kapteinn Grétar, Raggi afmælisbarn og Þorsteinn maskínustjóri, voru þeir sammála að Bubbi hafi sýnt sínar bestu hliðar.

Þó ástandið í þjóðfélaginu sé ekki gott þessa dagana er það nú ekki jafnt slæmt og Bubbi lýsir 1.maí í Malaga árið 1979. Skulum við vona að yfirvaldið fari ekki að nota vélbyssur og gúmmíkylfur gegn kröfugöngum verkalýðsins í framtíðinni, hvað þá að menn liggi dauðir í götunni. Stöndum saman vörð um okkar hagsmuni.

Þar til næst.

Kv. Jón Kj.

SVH