Viðbrögð

Já það stóð ekki á viðbrögðunum sem maður óskaði eftir hér í síðustu færslu, gaman að sjá hvað margir tóku við sér og kvittuðu fyrir innlitið, hafið bestu þakkir fyrir og vonandi verður framhald á slíku. Einnig er svo komið að flestir okkar hér um borð, svei mér þá ef það eru ekki allir, eiga nú betri helming heima fyrir sem ég trúi ekki öðru en fylgist með okkur á þessari síðu, kalla ég hér með eftir viðbrögðum frá þeim líka

Þá að fiskifréttum, ef allt gengur að óskum, þá erum við nú á okkar síðasta holi og er ætlunin að koma með sem ferskasta afla að landi, verður þá allur afli kældur á landleiðinni. Hífðum við eftir hádegið í gær og reyndust vera 400 tonn í sekknum, ekki gekk holið þar á undan eins vel. Áttum við í mesta basli við að hífa trollið inn á tromlu, var þetta það þungt í að kapteinninn mátti keyra vel á því til að reyna lyfta pokanum upp svo hægt væri að hífa. Tókst það að lokum og komum við pokanum á síðuna og hófst dæling, sem gekk ágætlega í byrjun en varði því miður allt of stutt. Steinsökk pokinn og ekkert gekk, endaði með því að eitthvað lét undan, slitnaði stertinn og kranavírinn fyrir fiskidæluna fór sömu leið, en sem betur fer hélt kraftblökkin þessu. Endaði þetta með því að pokinn sprakk, kannski lán í óláni?, og náðum við honum upp með dælunni og öllu saman, má segja að þetta endaði betur en á horfðist, því ekkert grín hefði verið ef poki með nemum, dælu og fleira hefði farið í sjóinn. En það sem við náðum að dæla voru einhver 60-80tonn.

 Löndun úr Jóni Kjartanssyni þann 16. apríl sl. (dagsetning á mynd er kolröng)

Þar til næst.

Kv. Jón Kj.

SVH

Athugasemdir

[vellarinn (IP-tala skráð) 30.4.2010 kl. 16:53]

Það er gott að þetta mjakast.  Við tökum því bara rólega í slippnum.

[Marzenna (IP-tala skráð) 30.4.2010 kl. 17:08]

Best að taka áskorun frá eiginmanni og kvitta fyrir 

Hlakka mikið til að fá þig heim elskan

Bið að heilsa öllum

[Jón Sendiherra (IP-tala skráð) 6.5.2010 kl. 11:11]

Það er ekki nó að biðja menn að kvitta og hætta síðan skriftum eða hvað

[Ritstjórinn sem er í fríi (IP-tala skráð) 6.5.2010 kl. 20:16]

Segðu Jón sendiherra, ritstjórinn fór í frí og það er enginn sem skrifar á meðan!!!!!!!!!!!!!! vítavert kæruleysi